شاری دڵ

 

مامۆستا ئاوات (سه‌ید کامیل ئیمامی)

من ده‌ڵێم شاری دڵم باغ و گوڵستانه ده‌چم

عه‌قل ده‌ڵێ نا قه‌سه‌به شوڕشی مه‌ستانه نه‌چی

من ده‌ڵێم نوخته‌ی ئه‌و ڕه‌وزه‌یی ڕیزوانه ده‌چم

ئه‌و ده‌ڵێ نا ڕه‌شه جێ ڕاوگه‌یی شه‌یتانه نه‌چی

من ده‌ڵێم مه‌سکه‌ن و ئارامگه‌یی جانانه ده‌چم

ئه‌و ده‌ڵێ سه‌ربه‌سه‌ری تێکچووه وێرانه نه‌چی

من ده‌ڵێم جێگه‌یی هه‌ر شێت و جنوونانه ده‌چم

ئه‌و ده‌ڵێ نا زه‌ده‌یی په‌نجه‌یی په‌ریانه نه‌چی

من ده‌ڵێم مه‌رکه‌زی ئه‌سراری حه‌ریفانه ده‌چم

ئه‌و ده‌ڵێ جێ ته‌مه‌عی چاوی حه‌سوودانه نه‌چی

من ده‌ڵێم وه‌ختی خه‌ته‌ر مه‌ئمه‌ن و قه‌ڵغانه ده‌چم

ئه‌و ده‌ڵێ کون‌کونه جێگه‌ی سه‌ره‌په‌یکانه نه‌چی

له‌م هه‌موو چوون و نه‌چوونه سه‌ری سوڕ ما کامیل

من ده‌ڵێم جوانه بچم، ئه‌و ده‌ڵێ وا جوانه نه‌چی