قادر عەبدوڵڵازادە ناسراو بە قالەمەڕە
لە ساڵانی پەنجاکان و دواتر لە ناوەندەکانی ڕادیۆ و تەلەفزیۆنی کرماشان، سنە، تاران، مەھاباد و ورمێ بە دەنگی سحراوی و ئاسمانی و بەربڵاوی شمشاڵەکەی چەندین پارچە موزیکی جوان و ڕەسەنی پێشکەش کرد و ھونەری موزیکی کوردی بە شکۆیەکی بێ وێنەوە ھێنا گۆڕەپانی ھونەرییەوە.
دواتر بۆ ماوەی چەندین ساڵ لەگەڵ ھونەرمەندی گۆرانیبێژی بەتوانای کورد حەسەن زیرەک ھاوکاری ھونەری کرد و لە پێشکەش کردنی گۆرانییەکانیدا بە ئامێری شمشاڵ یارمەتی دەدا.
قالەمەڕە ھونەرمەندی موزیک بووە بۆ بەیت، حەیران، لاوک، گۆرانی، مەقاماتی ڕەسەن و فۆلکلۆری کوردستان. قالەمەڕە خاوەنی چەندین بەرهەمی پڕبایەخ و بەھێز و جوانە کە هەموویان مۆرکی تایبەتی ئەم ھونەرمەندەیان پێوە دیارە و ناسنامەی ھونەری موزیکی دەوڵەمەندی کوردین و بۆ هەمیشە دەمێننەوە. بابەتی زۆربەی بەرهەمەکانی حەماسی و مێژوویی و عاشقانەیە و وەبیرھێنەرەوەی سیمای گوند و شارەکان و سروشتی جوانی کوردستانن و هەر کامەو بە جۆرێک مێژووی نەتەوەی کورد دەگێڕنەوەو لە دەزگا جۆراوجۆرەکاندا زۆر بە جوانی پێشکەشی کردوون.
قالەمەڕە لە ماوەی ساڵانی کار و خزمەتی ھونەری خۆیدا لە زۆربەی فیستیڤاڵە گرینگەکانی بواری ھونەری موزیک وەک فیستیڤاڵی موزیکی فەجر لە تاران، فیستیڤاڵی موزیکی کرمان و لە بۆنە و فیستیڤاڵەکانی سنە، کرماشان ئیلام، ورمێ، مەھاباد، سەقز، بۆکان، هەولێر و سلێمانی بەشداری کردووە و چەندین خەڵات و شانازی گەورەی بە دەستھێناوە. هەروەھا لە زۆربەی ئەو فیستیڤاڵانە تابلۆی سوپاس و ڕێزلێنانی پێبەخشراوە.
بارکردنی سەرنجەکان...