ماڵپەڕی لاجان: هونەر، کاریکاتێر، شێعر، پەندی پێشینیان و کەسایەتی

09/24 1397

 

ئەمجار سەختتەرەن زامم جە جاران
چڵ مدۆ دایم چون گەستەی ماران
هەر وە زۆر مەندەن ڕای ئامای نەفەس
تای ڕیشەی تاقەت شییەنم جە دەس
بڵێسەی فیراق سۆچنان جەستەم
ناسۆرەن زامان گازی خەم بەستەم
دووی کەواوی دڵ پۆشان سەر هەردان
زەرد کەردەن ڕوخسار پاییزی دەردان
سەرسامەن عاڵەم یەکسەر جە ناڵەم
فەڵەک مۆرەی بەد شانا وە تاڵەم
مەینەت سەر بەرزەن، شادیم زگارەن
ساقی! جامەکەت ئەمجار وەکارەن
بۆرێ وە مەجلیس لا بەر پەردەی شەرم
وە دەورێ دیسان بەزمێ کەرمێ گەرم
تا موتریب وە ساز حەنجەرەی بێگەرد
هوردۆ مەقامێ دەوا کەرۆ دەرد
بەڵ ناکا نەیچی بەیۆ جە لاوە
وە مەقامەکەی قەقنەس ئاساوە
بەزمێمان جەم بۆ چون هەردە جاران
بنۆشین جامێ وە یادی یاران
هەر وە زۆر مەندەن نیم نەفەس باقی
پڕ کەر جامەکت، دەخیلم ساقی!
ئەر ئازیز وەی تەور لێم کەرۆ ستەم
خەلاسیم نییەن ئەمجار خاتر جەم
عەرەق چون شەونم نیشتەن نە ڕووی گوڵ
تەڕ کەردەن تاتای توغراکەی سونبوڵ
جە قازانی خەم، دڵ کەردەن وە ئاو
وە درۆ ماچۆ مەگێروو گوڵاو
ئازیزم! گوڵاو بۆی خۆی کوڵمی تۆن
ئەر بۆی تۆ نەبۆ بۆی گوڵاو جەکۆن؟
زەڕەی بۆی زوڵفت کەفتەن نە بەرزان
بۆی گوڵان کەردەن جە بەرزان هەرزان
ئازیز، وە مەرگت گەر ئینسافت بۆ
هەنی کافییەن بۆی زوڵفت پەی تۆ
ئیتر چ حاجەت وێت مەدەی عەزاو
قەبووڵ کەری جەور مەگێری گوڵاو؟
مەولەوی

 

وشە کلیلییەکان:

ناردنی لێدوان

ناو:*
ئیمێل:*
دەقی لێدوان:
تۆخ لار هێڵدار هێڵدار له نێوه‌ڕاست | لای چه‌پ نێوه‌ڕاست لای ڕاست | دانانی وێنۆکه دانانی لینکدانانی لینکی پارێزراو هه‌ڵبژاردنی ڕه‌نگ | شاردنه‌وه‌ی ده‌ق دانانی کوتـنه‌وه وه‌رگێڕان به ڕووسی دانانی Spoiler
کۆدەکە بنوودسە: *