کاتێکی تایبه‌ت
دره‌نگانێکی کابرا له کارڕا گه‌ڕاوه بۆ ماڵێ، ماندوو و شه‌که‌ت، له‌به‌ر ده‌رگا کوڕه پێنج ساڵه‌که‌ی که چاوه‌ڕوانی بوو، کوتی:
- سڵاو بابه گیان، پرسیارێکت لێبکه‌م؟
- ئه‌دی بابه، چ پرسیارێک؟
- بابه! ئه‌تۆ، بۆ هه‌ر کاتژمێر کار چه‌ند پاره‌ی وه‌رده‌گری؟
باوکی به ناڕه‌حه‌تی وڵامی داوه:
- ئه‌وه په‌یوه‌ندی به تۆوه نییه، بۆ ئه‌وه‌ی ده‌پرسی؟
- هه‌ر ده‌مه‌وێ بزانم.
- باشه که وابوو بزانه، 20 دۆڵار!
کوڕه سه‌ری داخست و ئاخێکی هه‌ڵکێشا. دوایه چاوێکی له باوکی کرد و کوتی:
- ده‌کرێ 10 دۆڵارم بده‌یه‌ی؟
- ئه‌گه‌ر مه‌به‌ستت له‌و پرسیارانه هه‌ر ئه‌وه بوو تا بۆ کڕینی یارییه‌ک پاره‌م لێوه‌رگری، هه‌ڵه‌ت کردووه. بڕۆوه بۆ دیوی خۆت. تۆ بۆ هێنده له خۆبایی و ناجسنی؟ نازانی من ماندووم و بۆ ئه‌و ئاکاره منداڵانه‌ت کاتم نییه؟
- کوڕه به ئه‌سپایی چۆوه دیوه‌که‌ی و دهرکهی پێوه‌دا.
کابرا ده‌ستی کرد به بۆڵه‌بۆڵ: منداڵی ئێستا چه‌ند ناحاڵییه چ پرسیارێک ده‌کات...
پاش کاتژمێرێک کابرا ئارام بۆوه و له‌به‌رخۆیه‌وه کوتی له‌وانه‌یه به توندی له‌گه‌ڵ کوڕه چکۆله‌که‌ی دوابێ. به‌شکه‌م شتێکی پێویسته که داوای 10 دۆڵاری کردووه. خۆ که‌م واهه‌بووه داوای پاره له باوکی بکات.
کابرا چووه لای دیوی کوڕه‌که‌ی و دهرکهی کرده‌وه.
- نوستووی کوڕم؟
- نا بابه، هه‌ر درێژ بوومه.
- من بیرم کرده‌وه که له‌وانه‌یه به‌توندی له‌گه‌ڵت دوابم. ئه‌وڕۆ کارم زۆر بوو و زیاتر ماندوو بوومه و شانه‌که‌شم ده سه‌ری تۆدا شکاند. ها ئه‌و 10 دۆڵاره‌ی ده‌تهه‌ویست.
کوڕه پاره‌که‌ی وه‌رگرت و ده‌ستی له‌بن سه‌نیره‌که‌ی ڕۆکرد و چه‌ند پاره‌یێکی‌تری ده‌رهێنا. کابرا که دیتی کوڕه‌که‌ی پاره‌ی هه‌بووه، دیسان هه‌ڵچوو و به‌سه‌ریدا گوڕڕاند:
- ئه‌تۆ که پاره‌ت هه‌بۆو، بۆچی دووباره داوات له‌من کرد؟
- چونکه پاره‌که‌م ته‌واو نه‌بوو، به‌ڵام ئێستا من 20 دۆڵارم هه‌یه. ئه‌رێ ده‌توانم یه‌ک کاتژمێر له کاره‌که‌ی سبه‌ینێت بکڕم تا زووتر بێیه‌وه ماڵێ؟ ئاخر ئه‌من پێم خۆشه هه‌موومان پێکه‌وه نانی بخۆین!!